ميدو :اعتذر عن تسببي في جدل ولكن تشجيعي للزمالك فقط

أعتذر أحمد حسام “ميدو”، لاعب الزمالك السابق، عن تصريحه السابق بشأن عدم تشجيعه للنادي الأهلي في بطولة كأس العالم للأندية 2025.

قال ميديو في بيان له عبر موقع (إكس): “أنا إبن الزمالك، وأكبر فخر ليا في حياتي إني إبن المدرج .. ابن الثالثة يمين بلعب في الزمالك من وأنا عندي ٩ سنين، وأنا عيل صغير كنت بروح بفانلة الزمالك في المواصلات علشان الناس كلها تعرف إني ناشئ في الزمالك”.

أضاف: “بطاقتي وأنا عيل صغير هي كارنيه اتحاد الكورة اللي مكتوب عليه اسم الزمالك .. تتلمذت على إيد مدربين عظماء علموني اني انتمي لفريقي بس وما أشجعش اي نادي ثاني في مصر بالذات إلا نادي الزمالك اي كان بيلاعب مين ولكن في نفس الوقت اتربيت اني احترم كل المنافسين واهنيهم لو كسبوا واباركلهم واقولهم هارد لك لو خسروا”.

أكمل: “هو ده معنى الروح الرياضية بالنسبة لي!! لما اتسألت في الاستوديو هتشجع الاهلي في كاس العالم للاندية رديت بطبيعتي دون أي نفاق أو كذب لان بكل بساطة مفيش حاجه في الدنيا تستاهل انك تكون كذاب ومنافق!”.

تابع: “أتفق معاكم إن التوقيت ما كانش مناسب وبعتذر لأي حد زعل اني قلت الكلام ده في حدث مهم يخص النادي #الأهلي وانا شايف الناس اللي زعلت بخصوص ان الوقت مش مناسب عندهم كل الحق .. اما لو اتسألت مليون مرة هتشجع اي نادي تاني في مصر غير الزمالك إجابتي هتكون هي هي عمرها ما هتتغير لغاية لما اموت”.

واصل: “اما بخصوص الهجوم اللي بتعرضله فأنا عاذر الناس لانهم ممكن يكونوا اتعودوا على اجابات مختلفه في السنوات الاخيرة من ناس تصدروا المشهد في الاعلام وهما اكتر ناس بيأذوا المنافس في الخفاء واكتر ناس بتتمنى من قلبها خسارة المنافس من جواهم”.

أختتم: “مش هرد على أي حد هاجمني لان بكل بساطه أنا في مرحلة في حياتي شايف ان مفيش حاجه في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس بالنسبه لي ماتتعداش اكتر من كده!! مره ثانيه بعتذر اني كنت سبب في جدال قائم الايام اللي فاتت للاسف مش ذنبي ولكن بسبب مدمنين الترند والدخلاء على كرة القدم اللي لا يمكن يفهموا أبدا عقلية مشجع الكورة!!”.