إمام عاشور يكشف أسرار الأهلي: “اتعلمت حاجات مكنتش أعرفها.. والشناوي قائدنا وكلنا بنسمع كلامه”
حلّ إمام عاشور ضيفًا على بودكاست “القلعة الحمراء” مع سيد عبد الحفيظ، وكشف عن كواليس رحلته داخل النادي الأهلي، وكيف تغيرت شخصيته ومستواه منذ انضمامه إلى الفريق.
الأهلي غيّرني.. والشناوي قائدنا
أكد إمام أن الأهلي صنع الفارق في حياته، قائلاً: “كل حاجة اتغيرت.. لأن الأهلي منظومة ناجحة، كل واحد عارف دوره، وكلنا عندنا قائد وهو محمد الشناوي، بنسمع كلامه وده بيريّح أي لاعب جوه الفريق.”
وأضاف: “في الأهلي فيه حاجات بتجبرك إنك تلتزم.. لو خرجت بره السيستم، هتبقى بره النادي، والأهلي مبيقفش على حد.”
كانوا بيقولوا إني مش مركز.. لكن ربنا كرمني
نفى إمام عاشور الشائعات التي تحدثت عن عدم تركيزه في الكرة، مؤكدًا أنه كان يعمل بجد على تطوير نفسه، وقال: “الناس كانت شايفة إني مركز في حاجات برا الكرة، لكن الحقيقة إني كنت بشتغل على نفسي، والحمد لله ربنا كرمني وبقيت هداف الدوري.”
اتعلمت حاجات مكنتش أعرفها
تحدث عاشور عن التطور الذي شهده داخل الأهلي قائلاً: “عندنا نماذج كتير الواحد بيتعلم منها.. فيه حاجات مكنتش عارفها خالص، لكن اتعلمتها من زملائي في الفريق وفرقت معايا.”
وأضاف ممازحًا: “معانا حد في الفريق بدون ذكر اسمه، راح يشتري عربية وسأل الوكيل: العربية دي أورجينال ولا كوبي!”
موقف صعب مع والدته
روى عاشور موقفًا مؤثرًا من طفولته عندما تم استبعاده من أحد الأندية، وقال: “كنت في تمرين ووالدتي معايا، بعد ما خلصت المدرب قالها إمام ميجيش تاني.. لقيتها بتبكي، فقولتلها مش مشكلة هشوف نادي تاني، مش هقف عند كده.. وفعلاً بعدها انضميت للمحلة وصعدت للفريق الأول.”
نفسي أكسب كل البطولات مع الأهلي
وعن طموحاته، أكد عاشور: “نفسي أكسب كل البطولات مع الأهلي وأفرّح الجماهير.. من أول يوم ليا هنا والناس سنداني وواقفة في ضهري.”
ستاد الأهلي الجديد؟ هيبقى بيتنا
أعرب عاشور عن سعادته بملعب الأهلي الجديد، قائلاً: “الواحد بيكون مبسوط لما يلعب على أرضه.. زي ما بيقولوا ده بيتك، حاجة خاصة بالنادي الأهلي بس، وإن شاء الله يكون وشه حلو علينا.”
رسالة لجماهير الأهلي
واختتم عاشور حديثه برسالة لجمهور القلعة الحمراء: “النادي الأهلي مبيقفش على حد.. وأنا هنا عشان أدي كل اللي عندي وأفرّحكم.”
