رسالة صادمة من ناصر ماهر بعد تجاهله في قائمة منتخب مصر

أعرب ناصر ماهر، لاعب وسط فريق الزمالك، عن شعوره بالإحباط بعد استبعاده من قائمة منتخب مصر لمعسكر شهر نوفمبر المقام في الإمارات، استعدادًا لمنافسات كأس أمم إفريقيا 2025.

ونشر ماهر رسالة صريحة عبر حسابه على إنستجرام، قال فيها:
“أنا آسف إني بنزل الكلام ده، لأنه مش طبعي خالص، بس بصراحة الوضع محبط جدًا بالنسبة لي بسبب قائمة منتخب مصر.”

وأضاف:
“بكل صدق، أنا شايف إني أستحق أكون متواجد على الأقل ضمن المنتخب، خصوصًا إن الموضوع واضح إنه مش فني خالص، لأن كل النقاد والمحللين والصحفيين والجماهير المصرية وحتى الناس العادية بيتكلموا كويس جدًا عن أدائي في الفترة الأخيرة.”

واختتم اللاعب رسالته بالقول:
“بصراحة، اللي حصل ظلم كبير جدًا، وده مالوش علاقة بالكورة. المجهود اللي بذلته كله يروح كده على الفاضي، وأحلامي تضيع بكل سهولة كأنها حاجة عادية، رغم إني عملت كل اللي المفروض أعمله.. بجد حرام اللي بيحصل ده يحبط أي جبل.”

وتفاعل متابعو اللاعب بشكل كبير مع منشوره، مؤكدين دعمهم له ومثمنين جهوده مع الزمالك خلال الفترة الأخيرة.