شوبير يهاجم الزمالك بشأن نجم الفريق
هاجم الإعلامي أحمد شوبير، نادي الزمالك بسبب رغبته في عودة محمود علاء مدافع الاتحاد السكندري لصفوف الأبيض، في الفترة المقبلة.
وتحدث شوبير في تصريحات إذاعية: حاجة غريبة جدا محمود علاء اللي كان في الزمالك والزمالك مشاه والراجل راح السويحلي الليبي وعمل موسم كويس جدا مع الاتحاد السكندري فالزمالك صمم على إعادته فرجع وبعد ما رجع الناس هاجمته، وكان بيتعامل معاملة وحشة جدا على السوشيال ميديا.
وأضاف: محمود علاء رجع مضى في الاتحاد السكندري وطلع محمد أحمد سلامة عضو مجلس إدارة الاتحاد قال مستحيل محمود علاء يرجع الزمالك، هو جاله عرض بعد فسخ تعاقده مع السويحلي الليبي لكنه فضّل الاتحاد ووقع وخد مقدم العقد.
وتابع: يعني وبعدين ما أنت إللي مشيته عايزه تاني ليه هو الراجل اتعامل في الاتحاد السكندري أحسن معاملة وشعر أنه ملك هناك من تعامل الناس الجيد معاه، يا جماعة فيه ثوابت احنا متخيلين إن إحنا اللي بنحاسب، الأمور دي بتضايقني جدا والله.
وأتم: أنا بحب محمود علاء محترم ومؤدب وطيب بس معلش يا محمود هي دي الكورة أنت في نادي كبير ومرشح يبقى من ضمن التسع أندية اللي هيلعبوا على لقب الدوري الموسم ده.
