كهربا يكشف القصة الكاملة لترحيله إلى القاهرة وخصم مليون جنيه

كشف محمود كهربا لاعب الفريق الأول لكرة القدم بالنادي الأهلي، والمعار للاتحاد الليبي، القصة الكاملة لترحيله إلى القاهرة وخصم مليون جنيه، والتي كانت قبل أيام من لقاء ناري امام نادي الزمالك، في نهائي بطولة كأس السوبر المصري.

وقال كهربا خلال تصريحات تليفزيونية مع الإعلامي إبراهيم فايق: “بعد ماتش سراميكا في السوبر المصري كنت متعصب واتكلمت باسلوب وحش في اوضة اللبس، وكابتن محمد رمضان سمع فقالي انت موقوف″.

واوضح:″هو مكانش فيه كلام خارج بس انا تقبلت القرار والشناوي خدني وطلعنا على الباص واتبلغت بقرار اني انزل مصر، لكن اللاعبين بعد الخبر قعدوا مع محمد رمضان 3 ساعات عشان منزلش ووقفوا معايا لكن هو خد القرار وانا ماشي كنت بعيط″.

وبخصوص مباراة باتشوكا، فقال: ″بعد ماتش باتشوكا اللاعبية خدت مني الموبايل ومسحوا كل الابلكيشنز عشان مشوفش حاجة، امام عاشور خد التليفون هو والشناوي، وكنت حاسس اني عايز القيامة تقوم″.

واضاف: ″دخلت خدت منوم وقلت يارب ما اصحى ولغاية دلوقت مش عارف اتعافى من الماتش ده والموضوع كان صعب بالنسبالي وكنت ممكن اعمل حاجة في نفسي اليوم ده″.