“الدوري هيتلغي”.. شوبير يوجه تحذير إلى هاني أبو ريدة

وجه الإعلامي أحمد شوبير، تحذيرًا لهاني أبو ريدة من كارثة كبرى في الدوري المصري الممتاز، بسبب الأخطاء التحكيمية.

وتحدث شوبير في تصريحات إذاعية: هقول لكم حاجة المفروض ماسيمو بوساكا كان يعمل محاضرة أول إمبارح فقال لك نستعين بالمحاضرين المصريين، وجابوا الحالات اللي فيها شك فالمحاضرون المصريون قالوا لا نتفق مع قرارات الحكام في 4 حالات فالحكام فرحوا وقالوا إحنا صح.

وتابع: بعد كده عملوا نفس المحاضرة مع بوساكا وعرضوا نفس الحالات، فقال بوساكا كل الحالات غلط قرارات الحكام فيها، وبوساكا قال لهم هو انتوا معندوكوش كروت حمراء لقى كل الكروت الحمراء بتطلع بعد الفار.

وأضاف: المشكلة عندنا إن الحكام بقوا بيخافوا وقراراتهم مرتعشة وده نابع من المنظومة الكروية اللي كلها غلط، لا في قرارات رادعة ولا فيه حماية ولا فيه جراءة، مفيش مساندة قوية لحكم على دراية وصح.

وأردف: هتكلمها بالشكل ده يا باشمهندس هاني، يبقى هنقرأ الفاتحة على بطولة الدوري قريب جدا، اه والله مش بهزر، هنقرأ الفاتحة على المنظومة كلها لإن الأمر خلاص انتهى والـ18 نادي اللي في الدوري المصري خلاص الأمر انتهى بالنسبة لهم لإن الشخصيات اللي موجودة مستحيل تدير منظومة تحكيمية في أهم دوري في المنطقة العربية.

وأتم: الحقوا نفسكم قبل ما يفوت الأوان لإن الأمور صعبة جدا تحكيميا ولو هنفضل كده هيكون الدوري كل سنة وانت طيب.