والد زيزو: اللعب للأهلي مش حرام.. ونجلي مش هيموت بسبب تجميده

فتح مصطفى زيزو، والد أحمد سيد زيزو لاعب الزمالك، النار على إدارة ناديه بعد تجميد نجله واستبعاده من قائمة الفريق لمباراة ستيلينيوش، وذلك بسبب توقيعه على عقد مع الأهلي في مارس الماضي.

وفي تصريحات لبرنامج “ستاد المحور” مع خالد الغندور، قال مصطفى زيزو: “ميدو هو المسؤول عن تطفيش ابني من الزمالك، هو اللي بيدير النادي دلوقتي مش حسين لبيب. لو مش عاوزين يجددوا لابني أو يقدروه، يبقى هما أحرار”.

وأضاف: “ابني مش هينتحر عشان تجميده في الزمالك، هو محتاج يريح أعصابه. اسألوا شيكابالا لأنه كان بيتواصل مع إدارة الزمالك من أجل تجديد العقد”.

وتابع مصطفى زيزو: “اللعب في الأهلي مش حرام، وأنا مش مطالب أقول إذا كنت وقعت مع الأهلي أو لا. احنا انتظرنا كتير مجلس الزمالك وماعملش حاجة، مش هبوس على إيديهم عشان يتعاملوا مع ابني”.

واختتم: “مجلس الزمالك فيه شخصيات محترمة زي هاني بيرزي وعمرو أدهم، لكنهم تم إبعادهم عن ملف ابني لأنهم رفضوا تسليمه للجماهير”.