″كان نفسي اتقدر″.. يوسف حسن يكشف القصة الكاملة لأزمته مع الزمالك

كشف يوسف حسن لاعب الزمالك السابق والمنتقل حديثًا إلى نادي إنبي، القصة الكاملة لأزمته مع الزمالك بعد اصابته.

وقال يوسف حسن في تصريحات تلفزيونية مع الاعلامي ابراهيم عبدالجواد:″ تعرضت لإصابة في كاحل القدم أثناء لعبي مع الزمالك وكنت بحاجة لإجراء جراحة، وقعدت في البيت 4 شهور ودكتور اسامة قال العملية نتركها كحل اخير لكن الاصابة تفاقمت وكان لابد من العملية″.

وتابع:″كابتن هشام نصر اتصل عليا وقالي تعالى وروحنا للدكتور واتقال عملية وتنظيف وبدأنا في العلاج وقعدت في البيت 3 شهور، واتصل بكابتن هشام نصر محدش بيرد عليا، لما نزلت بوست قلت فيه الكلام ده كلموني ورحت لكابتن حسين لبيب قالي شوف هتتعالج فين واحنا هندفع″.

واضاف: ″روحت لدكتور خالد الشناوي اتعالجت معاه شهرين، مدفعوش الفلوس فانا اتكسفت اروح تاني لان الراجل كان بيطالب بفلوسه وقعدت في البيت شهرين كمان، وكلمت دكتور احمد اسامة طبيب الزمالك قالي تعالي اعمل تأهيل في النادي″.

واردف:″ولكن عبد الواحد السيد رفض ذلك وقالي جوميز مش عايزك تجري حوالين الملعب قلتله هو لو لاعب كبير اتصاب هتقولوله نفس الكلام؟ وجوميز يعرفني منين، الموضوع ده اثر في نفسيتي نزلت بوست تالت وقتها وقلت ان مفيش اهتمام″.

واختتم: ″رجعوني وقتها اتعالج واتمرن هناك وفي الاخر بدون مقدمات لقتهم بعتوا قايمة الفريق وانا مش موجود فيها بدون ما يبلغوني، وكان نفسي اتقدر وتعالجني″.