تطورات مثيرة في مفاوضات زيزو مع الزمالك لتجديد عقده

كشف الإعلامي أحمد شوبير، عن تطورات مفاوضات أحمد سيد زيزو مع الزمالك، من أجل تجديد عقده.

وتحدث شوبير خلال تصريحات إذاعية: زيزو تم الاتفاق معه ومع والده اللي هو وكيل أعماله منذ حوالي شهر على المقابل للتجديد وعلى كل حاجة وممدوح عباس رئيس نادي الزمالك السابق وعد بأن يكون له دور كبير في تجديد اللاعب.

وتابع: بعد ذلك دخل نادي الاتفاق السعودي وقدم عرضا لاستعارة زيزو بنية الشراء فزيزو رفض الإعارة بنية الشراء وطلب من الزمالك التجديد لمدة 3 سنوات، والزمالك كان معروضا عليه 1.5 مليون دولار لاستعارة اللاعب وبعض الناس قالوا أرقام تانية فالزمالك قال للاعب كمل معايا لآخر السنة وبعدها الله يسهل لك ده حل، أو قالوا هنجدد لك بس اطلع سنة إعارة عشان إحنا في أشد الاحتياج لفلوس.

وأضاف: حدث انقسام داخل مجلس إدارة الزمالك حول بقاء زيزو من رحيله، والبعض قال عندنا أزمة مالية طاحنة والفلوس اللي تيجي لنا من زيزو هتكون كويسة وهتوفر لنا سيولة دولارية لشراء لاعبين جدد وتدعيم الفريق.

وأشار: الدنيا فضلت تروج وتيجي وكلام رايح وكلام جاي، وبعد كده اتصلوا بوالد زيزو قالوا له تعالى عشان نخلص فراح لهم، فقالوا له هنديك اللي اتفقنا عليه بس بدل ما نديك فلوس هنديك شاليه تحت الإنشاء في أحد الأماكن الساحلية وهنحسبوا بـ 3 مليون جنيه بس مش هتتصرف فيه إلا بعد نهاية عقد زيزو (وده كلام بقوله لحضراتكم من قلب الجلسة).

وأردف: والد زيزو رد وقال لهم يا جماعة أنتوا قولتوا هتدونا فلوس في أيدينا ومشي الراجل واتصل تليفونيا بحسين لبيب قال لهم أنا مستني الموقف النهائي ليكم يوم الخميس المقبل، وإذا لم تردوا علينا حتى يوم الخميس من يوم الجمعة هبدأ أناقش العروض اللي جايلي وأبرزها من نادي الاتفاق.

وأتم: النهارده في اجتماع ما بين أعضاء مجلس إدارة نادي الزمالك مش عارف رسمي ولا لأ لمناقشة وحسم هذه الأزمة.