شوبير يوجه رسالة نارية لـ هاني أبو ريدة
وجه الإعلامي أحمد شوبير، عدة رسائل لـ هاني أبو ريدة بعد اقترابه من رئاسة الاتحاد المصري لكرة القدم، بعد رحيل مجلس جمال علام.
وتحدث شوبير في تصريحات إذاعية: عندي كلام عايز أقوله على العلن للمهندس هاني أبوريدة وأنا قلته ليه في مكالمة بينني وبينه، وأنا بقول له إياك وتكرار أخطاء الماضي متجبليش حد سمعته مش نظيفة متجيش حد يبوظ اللعبة أو حد من بتوع إحنا المسؤولين عن الكورة عشان لو هذا الأمر تكرر مرة ثانية يبقى أنت بتعيد نفس الأسامي القديمة ونفس الأسماء الملوثة حتى لو من تحت لتحت ويبقوا شغالين منالأبواب الخلفية.
وتابع: الناس اللي زي دول خلصوا وأبوريدة قال لي إمبارح الزمن بالنسبة للناس دي مش موجود توقف خلاص أتمنى ده يكون حقيقي،كمان عايز أقول له يا باشمهندس هاني اتحاد الكرة لن يديره إلا اللجان لجنة المسابقات، الحكام، شؤون اللاعبين، الانضباط، الاستئناف،التراخيص والمناطق إلى أخره، وكل لجنة تاخد صلاحياتها كاملة.
وأضاف: أهم حاجة لجنة الحكام تساندهم بكل قوة لغاية ما تمسك عايزهم يكملوا ماشي عايز تجيب خبير أجنبي المهم يبقى فيه لجنة حاكم قوية وفيه ناس كويسة بس إياك والاستعانة بالفاسدين لإن ده معناه اتحاد الكرة هيخرب وأنت جاي عشان تعدل المايل.
وأتم: كمان اللوايح عشان كل واحد يبقى عارف ما له وما عليه عشان أنا شامم ريحة مش حلوة من بدري، وأيضًا لا يصح اتحاد الكرة ليس لديه متحدث رسمي حتى الآن وموقع اتحاد الكرة شكله مش كويس، وأخيرًا لا يصح أن تظل تدير اتحاد الكرة من هذا المقر الصغير ويجب أن تنقل نشاطك إلى مشروع الهدف في مدينة السادس من أكتوبر.
