“كهربا سرطان في الأهلي”.. تعليق مثير من نجم الزمالك
علق أحمد حسام ميدو نجم الزمالك السابق، على رد فعل محمود كهربا لاعب الأهلي ومنع زملائه بالذهاب لتحية جماهير الفريق.
ونشر ميدو عبر منصة “إكس“: من حق المشجع إللي هو أكثر واحد بيتأثر نفسيًا بأي نتائج سلبية أو بأي تصرفات تقلل من النادي صدرت من أي شخص داخل المنظومة، إنه يعبر عن غضبه طالما الغضب ده مافيهوش أي سب لأي شخص.
وتابع: ولكن غضب عن طريق إيصال رسائل إلى الإدارة والجهاز واللاعيبه، وده إللي عملوه فعلا جمهور الأهلي قبل الماتش، ورد فعل اللاعيبة كان عظيم بالفوز الكبير، وطبيعي إن الجمهور لما يلاقوا لاعيبتهم موتوا نفسهم في الملعب إنهم يحيوهم بعد الماتش علشان يقفلوا الصفحة ويوصلوا للاعيبة رسالة إن بفوزك النهارده الكبير الصفحة اتقفلت ومش هنقبل إلا بالأداء والنتائج دي.
وأضاف: وهي دي عقلية مُشجع الأندية الكبيرة مفيش غيرها وعقلية المشجع دي هي إللي بتتنقل لكل فرد داخل المنظومة وهي أساس نجاح أي نادي كبير.
وأكمل: كان لازم اللاعيبة تروح تحيي الجمهور، ويفهموا إن جمهورهم معاهم مش ضدهم، إنما إيه إللي حصل، مين المستفيد الأكبر إن يكون في خلاف ما بين الجمهور والمجموعة علشان مايبقاش شايل الليلة لوحده؟ مين ورط الشناوي واللاعيبة في مشكلته مع الجمهور؟
وأتم: الحقيقة هو لاعب واحد فقط وجوده سرطان داخل أي فريق، هو كهربا، وهو فعلا كما قلت من قبل وبعض من أصدقائي الأهلاوية زعلوا مني قرار التوقيع معاه أكبر غلطة في تاريخ الأهلي!!
