خالد الغندور يشعل الجدل: إيه الفرق بين ديانج وزيزو؟ الإعلام لازم يكون واحد
علق الإعلامي خالد الغندور على الأنباء المتداولة بشأن رحيل لاعب الأهلي المالي أليو ديانج، مشددًا على ضرورة المساواة في طريقة تعامل الإعلام مع انتقالات اللاعبين، ومقارنًا موقف ديانج بما حدث مع أحمد سيد زيزو عند رحيله عن الزمالك.
وأشار الغندور إلى أن نادي فالنسيا الإسباني يقترب من التعاقد مع ديانج في صفقة انتقال حر بنهاية الموسم الحالي، مؤكدًا أن كل الأمور باتت جاهزة لإتمام الصفقة الصيف المقبل.
ونشر الغندور عبر صفحته الرسمية على فيسبوك:
“إيه الفرق بين زيزو وديانج؟ ده جاله عروض بالملايين من أندية أوروبية ونيوم، وديانج من سنتين، لكن الأهلي طلب 10 ملايين دولار مش أقل، ودلوقتي راح فالنسيا ببلاش. ولو كان مجدد كان هيدفع فيه ملايين. ده برده رحل ببلاش، وده برده رحل ببلاش، هنا تم سلخ المجلس من الإعلام اللي فرّط في اللاعب ببلاش، وهنا مافيش مشكلة تفرط ببلاش في رامي ربيعة وأكرم توفيق، ودلوقتي ديانج. هنا ممكن يبقى كبري، وهنا لا، هنا لاعب لم يقل الحقيقة، وهنا واضح، وهنا لاعب مصري وأسطورة، وهنا لاعب أجنبي.”
وأضاف: “ممكن أعرف تعامل الإعلام في الحالتين واحد ولا فيه فرق؟ هنا فلوس راحت بالملايين على الناديين ولا نمشيها على نادي واحد؟ وأخيرًا، مش أيام زيزو ورامي ربيعة، اللاعب الدولي رحل ببلاش ومعاه أكرم توفيق الدولي كمان، ولا أنا بقول كلام ما حصلش؟ والمعايير لازم تكون واحدة بلا حسابات.”
واختتم الغندور حديثه بالتأكيد على ضرورة تطبيق معايير موحدة وشفافة على جميع انتقالات اللاعبين، بغض النظر عن جنسياتهم أو أنديتهم السابقة، لضمان العدالة الإعلامية والاحترافية في متابعة سوق الانتقالات.
